Arrestohen dy të rinj nga Tirana, pak kohë pasi i morën me dhunë rreth 4 mln lekë dhe automjetin një 62-vjeçari në Peshkopi. Gazetari Enver Doçi raporton për BalkanWeb se në pranga kanë rënë Gentian Sula dhe Ardit Topuzi. Referuar policisë, Sula 25 vjeç, banues në Dibër dhe Topuzi, 20 vjeç banues në Tiranë, kishin zbritur nga makina dhe i kishin marrë me dhunë paratë shtetasit M. Gj., duke i shkaktuar dëmtime në trup, dhe më pas ishin larguar me shpejtësi me automjet.
Menjëherë pas denoncimit, policia ka mundur të identifikojë dy autorët si dhe lokalizimin e mjetit me të cilin u larguan.
Pas disa orësh ndjekjeje, policia arrestoi autorët në aksin rrugor Peshkopi-Bulqizë, të cilët po lëviznin me një mjet tip “Fiat”. Gjatë kontrollit në mjet, u gjet edhe shuma prej 364.000 lekë të rinj që i morën me dhunë 62-vjeçarit.
Njoftimi i policisë:
I morën me dhunë një shumë parash, një shtetasi, falë reagimit në kohë, veprimeve hetimore të shpejta dhe profesionale, si dhe ndjekjes së pandërprerë, në kuadër të operaconit “Vapori”, Policia kap dhe arreston brenda pak orësh 2 autorët e dyshuar.
Sekuestrohet shuma e parave 364.000 lekë të rinj, që i morën me dhunë 62-vjeçarit, si dhe automjeti me të cilin u larguan autorët e dyshuar.
Pas marrjes së njoftimit se në sheshin “Vapori”, në qytetin e Peshkopisë, dy shtetas të paidentifikuar kishin zbritur nga makina dhe i kishin marrë me dhunë një shumë parash shtetasit M. Gj., 62 vjeç, duke i shkaktuar dëmtime në trup, dhe më pas ishin larguar me shpejtësi me automjet, shërbimet e Drejtorisë Vendore të Policisë Dibër dhe ata të Komisariateve të Policisë Dibër dhe Bulqizë, janë vënë menjëherë në ndjekje të autorëve të dyshuar.
Si rezultat i reagimit në kohë, punës së mirorganizuar dhe bashkëpunimit të strukturave të Policisë, u bë i mundur identifikimi i 2 autorëve të dyshuar dhe lokalizimi i automjetit me të cilin ata po qarkullonin.
Në kuadër të operacionit policor “Vapori”, shërbimet e Policisë bënë të mundur që pas disa orësh ndjekjeje, të kapnin, në aksin rrugor Peshkopi-Bulqizë, 2 autorët e dyshuar, të cilët udhëtonin me një mjet tip “Fiat”, në të cilin, gjatë kontrollit, Policia gjeti dhe sekuestroi edhe shumën e parave (364.000 lekë të rinj), që i morën me dhunë shtetasit M. Gj.
Në përfundim të veprimeve të para hetimore është bërë arrestimi në flagrancë i autorëve të dyshuar:
G. S., 25 vjeç, banues në Dibër dhe A. T., 20 vjeç, banues në Tiranë, për veprën penale “Vjedhja me dhunë”, kryer në bashkëpunim.
Materialet procedurale iu referuan Prokurorisë, për veprime të mëtejshme.
and then