Regjisori i filmit Jean-Luc Godard, i cili udhëhoqi valën e re revolucionare franceze të kinemasë, ka ndërruar jetë në moshën 91-vjeçare.
Godard shpërtheu në skenë me À bout de souffle (Pa frymë) në vitet 1960. Më pas ishte regjisor i një seri filmash të mirënjohur që rishkruan rregullat e kinemasë, si Le Mépris, Bande à Part dhe Alphaville.
Puna e tij ndikoi regjisorët nga Quentin Tarantino te Martin Scorsese. Presidenti francez Emmanuel Macron tha se vendi kishte humbur një thesar kombëtar dhe një gjeni.
Godard e filloi si kritik filmi përpara se të dilte pas kamerës duke sjellë Breathless.
“Ishte një film që përfshiu gjithçka që kishte bërë kinemaja, vajza, gangsterë, makina, shpërtheu të gjitha këto dhe i dha fund, njëherë e përgjithmonë, stilit të vjetër”, ka deklaruar regjisori i ndjerë.
Kjo u pasua nga Le Petit Soldat (Ushtari i Vogël), megjithëse filmi u ndalua deri në vitin 1963 për shkak të përshkrimit të torturave të sanksionuara nga qeveria.
Kasti përfshinte aktoren Anna Karina, e cila u martua me Godard në vitin 1961 dhe vazhdoi të shfaqej në një varg filmash të tij më të suksesshëm.
Ajo luajti rolin e një striptiste klubi nate që dëshiron një fëmijë në Une Femme est une Femme të vitit 1961; një prostitutë të re parisiene në Vivre sa vie të vitit 1962; dhe një anëtare të bandës në Band of Outsiders në 1965.
Në një deklaratë për agjencinë e lajmeve Reuters, ish-ministri francez i kulturës Jack Lang tha: “Ai e mbushi kinemanë me poezi dhe filozofi. Syri i tij i mprehtë dhe unik na bëri të shohim të padukshmen.”