Deri më 10 korrik, kur do të kthehet në fushë, Dinamo mund të humbasë ndonjë element, sepse për lojtarët e saj ka interes në treg. Nga sezoni i fundit janë larguar Agim Ibraimi, Aleksandar Sofranak, Goran Siljanovski dhe Aleksandar Isaevski.
Të tjerët janë nën kontratë dhe klubi i ka në plane për sezonin e ardhshëm. Nëse dikush duhet të lërë Dinamon, duhet patjetër të arrijë një marrëveshje me klubin. Kontratat mund të ndërpriten vetëm me miratimin e drejtuesve të skuadrës blu.
SIMONI
Për portën drejtuesit e Dinamos i kanë bërë planet me Edvan Bakajn, sepse Simon Simoni pritet të shitet jashtë vendit. Për të ka kohë që interesohen klube të ndryshme, madje përfaqësues të Udinezes e ndoqën nga afër në një ndeshje në “Elbasan Arena”. Një dëmtim dhe operacioni i apendicitit i prishën disi planet. Megjithatë, shitja e portierit lezhjan është vetëm çështje kohe. Me transferimin e tij jashtë vendit klubi blu pritet të arkëtojë një shumë të konsiderueshme. Simoni është grumbulluar me Shpresat kohët e fundit, si dhe nga trajneri Reja për miqësoren me Estoninë. Vlera e tij në treg është rritur ndjeshëm, kjo edhe për shkak të moshës së re.
TË TJERËT
Nuk është vetëm portieri Simoni që kërkohet në treg. Edhe lojtarë të tjerë të Dinamos janë në fokusin e klubeve të Superiores. Problem mbeten kontratat që këta lojtarë kanë me blutë, por nuk përjashtohet mundësia që ndonjëri prej tyre të largohet, po gjeti akordin me klubin. Te ky grup bëjnë pjesë mesfushorët Besir Demiri dhe Lansinet Sidibe. Për të parin ka pasur një interesim nga Partizani, kurse për afrikanin ka sinjale nga klube të huaja. Eni Imami përflitet për kthimin te Vllaznia.
Janë të tre lojtarë me përvojë që mund t’i bëjnë punë çdo skuadre elitare. Edhe Edis Maliqi e Alesio Mija janë dy nga elementët që kanë ngjallur interes. Ndryshon pak puna për lojtarë më të mëdhenj në moshë, si Sabien Lilaj dhe Rexhinaldo. Tani gjithçka e kanë në dorë drejtuesit e Dinamos. Nëse binden nga ofertat, ata mund të lirojnë ndonjë nga lojtarët që kanë nën kontratë. Në të kundërt duket e vështirë që lojtarët e përmendur më sipër të veshin një fanellë tjetër sezonin e ri.
Arena e Lajmit
Loading…
and then