Di Maria? Granfichaje!”, thotë i bindur Iker Kasijas. Ndonëse 34-vjeçar, mbi Angel di Marian ka një besim shumë të madh, madje mjaft prej ish-shokëve të tij garantojnë se kanë bërë një goditje vërtet të madhe, siç garanton, ndonëse në spanjisht, ish-portieri, kapiteni dhe legjenda e Realit të Madridit në intervistën ekskluzive për prestigjioze italiane, “Gazzetta dello Sport”.
Kasijas është një aset legjendar i klubit “Merenge”, i futbollit spanjoll dhe atij botëror, prandaj edhe italianët vendosën që ta intervistonin atë në “Dhomën e Futbollit”, muzeu 7-katësh i sportit në Madrid, brenda të cilit ruhen mbi 4000 objekte historike të koleksionuara në 32 vitet e fundit.
Iker, si ecën jeta juaj?
Mjaft mirë, faleminderit. Nga njëra studioj e mësoj, nga tjetra përpiqem të jem aktiv. Nuk mërzitem dhe le të them se kam gjetur rrugën time. Jam pjesë e futbollit, por jo totalisht, pak a shumë si roli im i portierit, që vërtet marr pjesë në lojë, por në pjesën më të madhe të ndeshjes jam një vëzhgues i jashtëm.
Besoj se kuptoni që ju kemi thirrur në apel për Angel di Marian, me të cilin keni luajtur 4 vite në Madrid (2010-2014) dhe fituat Champions-in e dhjetë, nën urdhrat e Karlo Ançelotit.
Kujtime madhështore! Një futbollist i shkëlqyer dhe nëse Juventusi e merr, për më shumë me parametër zero, ka bërë një “biznes” fenomenal. Pa asnjë dyshim!
Edhe pse është 34 vjeç?
Patjetër, dhe për disa arsye të ndryshme. Pikësëpari, mosha në futbollin e sotëm vlen relativisht, pasi karriera ka nisur të zgjatet së tepërmi.
Merrni shembull mikun tim Bufon, që ende shprehet mjaft mirë në moshën 44- vjeçare. Apo nëse doni më shumë, shihni Karim Benzemanë dhe Luka Modriçin për të mbetur brenda sferës Real. Së dyti, Di Maria është një tip shumë i kujdesshëm dhe e ka kuruar gjithmonë fizikun e tij. Së treti, nuk ka vuajtur kurrë dëmtime të rënda në karrierë dhe më duket ende në një formë madhështore. Së katërti, ambientohet shpejt dhe në Europë ka luajtur gjithmonë në nivele të larta, në klube të mëdha.
Ndonjë detaj tjetër për të veçuar?
Po, inteligjenca taktike, përveç cilësive teknike. Juventusi po merr një futbollist që di të bëjë shumë gjëra në zona të ndryshme të fushës. Kur fituam Champions-in e dhjetë, Ançeloti në mes të sezonit i ndryshoi pozicion dhe ai u shpreh me rezultate fantastike.
Nga ajo periudhë e deri më sot ka ndryshuar disa ekipe dhe ka mësuar të lëvizë edhe në situata të tjera të ndryshme, duke ditur që të luajë më i avancuar apo edhe në mesfushë. Shkurt, është një tip i zgjuar që e njeh mirë futbollin dhe te Juventusi do të sjellë eksperiencë dhe baza të hekurta në pozicionin që do të mbulojë, aq më shumë në aventurën Champions. Madje, pikërisht në Europë, Di Maria është nga ata që ka një eksperiencë më shumë se të madhe.
Gjithsesi, duhet të dini se Seria A është një kampionat i veçantë…
E vërtetë, por po harroni se Di Maria ka luajtur në Argjentinë, në Portugali, në Spanjë, në Angli dhe në Francë, përveçse për mbi një dekadë me kombëtaren e vendit të tij. Dhe gjithmonë është shprehur mjaft mirë. Ndaj, rrini të qetë, sepse një si Angel nuk ka probleme në përshtatjeje, as në Itali, pasi jo më kot jua theksova edhe përshtatjen e tij taktike. E përsëris, Juvja ka bërë një goditje madhështore. Dhe pastaj ka edhe një tjetër gjë…
Urdhëroni…
Di Maria po shkon në një skuadër të madhe. Kanë Kiezën e Vlahoviçin dhe, me sa duket, e kanë mbyllur edhe me Pogbanë. Më duket se po i bëjnë gjërat mirë deri tani dhe të mos harrojmë as faktin se Alegri është një trajner me eksperiencë. Jam gati të vë bast se Di Maria do ta shtyjë Juven në një hap më cilësor, si në Serinë A, ashtu edhe në Europë.
Kjo, pasi në nëntor zhvillohet edhe Botërori, prandaj ai donte një skuadër ku të luante me vazhdimësi dhe të përgatitej më së miri për aventurën në Katar. Mendoj se zgjodhi Juven pikërisht për këtë.
JETON STAMOLLA – Arena e Lajmit
Loading…
and then