Policia italiane ka arrestuar një 33-vjeçar shqiptar me drogë. Shqiptari me banim në Pistoia u ndalua në unazën veriore të Pratos, pasi ishte nën vëzhgim prej disa kohësh nga seksioni i Antidrogës i ekipit të lëvizshëm, nisur nga historia e tij dhe përfshirja e tij në tregtimin me shumicë të kanabinoideve.
Hetuesit ndaluan makinën e tij, teksa shqiptari pas një kërkese për të ndaluar mjetin për kontroll, tentoi të arratisej. Agjentët megjithatë arritën ta pengonin me një makinë shërbimi.
Kështu nisën kontrollet personale dhe ato të automjeteve: në bagazhin e makinës u gjetën dy çanta me 18 mbështjellës celofani të mbyllura me nxehtësi dhe brenda rreth 10 kilogramë marijuanë. Gjithashtu, burrit iu gjetën edhe 1800 euro para cash, një shumë e cilësuar si të ardhura nga veprimtaria e paligjshme.
Për të arrestuarin për qëllime shpërndarjeje droge është caktuar masa e sigurisë arrest me burg.