Media e njohur braziliane “ge.globo.com” i ka kushtuar një speciale futbollistit të Bylisit, Lorran Oliveira Kuintanilha. Titulli i këtij shkrimi ishte: “Ish-premtimi i Vasko dhe Seleçao, Lorran kapërcen dëmtimet dhe rifillon karrierën në futbollin shqiptar”. 26- vjeçari, edhe pse pranon se jeton dhe luan në një zonë të izoluar si Ballshi, sërish ai është i kënaqur për momentin, pasi po arrin të rifitojë emocionet e lojës së futbollit. Lorran tregon vështirësitë që ka haur në Shqipëri, ku rendit motin e ftohtë dhe zbrastësinë e stadiumeve, nivelin e futbollit dhe përshtatjen e tij.
Ja specialja që media braziliane i ka kushtuar mbrojtësit të Bylisit, Lorran: Mbrojtësi i majtë humbi hapësirën në Brazil pas një dëmtimi në gju dhe iu desh të rikuperonte karrierën në kategorinë e dytë (Kategoria e Parë) të Shqipërisë. Në Shqipërinë e Jugut, 150 kilometra larg kryeqytetit Tirana, një klub i quajtur Bylis luan në qytetin e Ballshit. Popullsia lokale është rreth 7 mijë banorë. Do të duhej të paktën trefishi i numrit të njerëzve në Ballsh për t’iu afruar ngarkesës totale të biletave të Sao Januario, ku Lorran u rrit dhe u trajnua si lojtar i Vaskos.
Mbrojtësi i majtë doli si një nga premtimet e Vasko-s në mesin e viteve 2010. Ai bëri debutimin e tij profesionist në 2014-ën. Një vit më pas, ai u thirr për të luajtur me kombëtaren në U-20 të Brazilit në Kupën e Amerikës së Jugut. Loran, megjithatë, pësoi lëndime në këtë periudhë. Një dëmtim i rëndë në gju e bëri atë të ndalojë për nëntë muaj në 2016-ën dhe të humbasë terrenin përgjithmonë. Tashmë 26 vjeç, Loran po përpiqet të rifillojë karrierën e tij në Shqipëri.
Që kur u largua nga Vasko, në vitin 2017, ai ka luajtur për klube më të vogla në Brazil dhe më pas u bë pjesë e futbollit të Qipros. Ai iu bashkua Bylisit në janar 2021, por nuk mundi të shmangë rënien e ekipit. Megjithatë, në sezonin 2021-2022, si Lorrani, ashtu edhe Bylis, filluan të ngriheshin sërish në këmbë. Duke luajtur si mesfushori i dytë, Lorrani rifilloi të jetë më aktiv në fushë dhe duke luajtur më shumë ndeshje, e ndihmoi Bylisin të dilte kampion dhe të rikthehej në kategorinë e parë (Kategoria Superiore). Braziliani ka rinovuar kontratën me klubin për sezonin e ardhshëm.
“Unë tashmë kam një frekuencë të mirë ndeshjesh, duke pasur më shumë minuta në dispozicion. Mendoj se ishte një nga sezonet më të mira të jetës sime. Skuadra gjithmonë lufton atje në mes të tabelës, nga mesi e poshtë, por struktura është e mirë, gjithçka është e organizuar”, u shpreh fillimisht Lorran për “ge.globo.com”.
STADIUME TË FTOHTA DHE BOSH
Nga premtimi i Vaskos dhe Brazilit e deri te liga e dytë e Shqipërisë, Loran pa anën më pak magjepsëse të futbollit. Ai u ndalua pasi u dëmtua në Pafos, Qipro. Në Shqipëri vuajti nga i ftohti, si nga moti, ashtu edhe nga ambienti në stadiume. “Kisha ditë që dridhesha në stërvitje. Këtu vetëm Partizani dhe Tirana kanë mbështetje të madhe tifozësh. Në përgjithësi, në stadiume janë vetëm një grup njerëzish, nuk është e njëjta gjë si në Brazil.
Është një ndryshim i madh. Mbërrita nga Sao Januario, ku stadiumi ishte plot, ndërsa shkoj në ndeshje ku pothuajse nuk ka asnjë. Por ju duhet të mësoheni me të, apo jo? Është ajo që kemi për momentin. Më duhet ta shfrytëzoj këtë mundësi sikur të ishte e fundit, për të kërkuar diçka në karrierën time dhe rifillimin”, vijoi më tej futbollisti brazilian i Bylisit.
SHQIPËRIA, NJË MËSIM NË GJEOPOLITIKË
Shqipëria ndodhet në Ballkanin jugor, e vendosur mes Greqisë dhe vendeve të ishJugosllavisë. Me një histori të gjatë nacionaliste, ajo kishte tensione edhe me fqinjët e saj, veçanërisht për shkak të popullsisë së madhe shqiptare që jeton në vende si Maqedonia e Veriut.
Në Ballshin e vogël, Lorrani përfundon disi i pavëmendshëm ndaj tensioneve. Kostoja e jetesës është e ulët, cilësia e jetës është e mirë dhe klubi ka një strukturë të pranueshme. Shqipëria është një nga vendet në Europë me shkallën më të ulët të zhvillimit, megjithëse është ende përpara Brazilit.
“Qyteti nuk ka asgjë, është sikur të jesh në fshat, disi i izoluar. Sa herë që kemi pushim, shkojmë në plazh ose në kryeqytet”, tha Lorran. Megjithatë, disa aspekte të jetës së përditshme na kujtojnë se kjo pjesë e Europës ka pasur ditë më pak paqësore. “Trajneri ynë është nga Maqedonia, por flet shqip. Portieri ishte nga Maqedonia, por fliste edhe shqip. Edhe Kosova është afër. Nuk e di pse janë të gjitha tensionet, por janë vende shumë të afërta”, tha braziliani.
PËRQENDRIMI TE SEZONI I RI
Në fushë, Lorrani pati një përshtatje më të shpejtë me mjedisin e ri. Objektivi kryesor për të pranuar sfidën e të luajturit në Shqipëri ishte që të kishte sërish sa më shumë ndeshje të luajtura. Ai u befasua nga forca fizike e sportistëve vendas, por beson se është mësuar me stilin e ri. Tani, synimi është të vazhdojë rikuperimin e karrierës së tij.
“Futbolli është më pak i shpejtë, më pak teknik nga sa jemi mësuar, por shumë taktik dhe i fortë fizikisht. Tani po përshtatem mirë. Më pëlqen shumë atje, u përshtata me stilin e lojës dhe dua të bëj mirë këtë sezon, për të kërkuar një situatë më të mirë”.
ERJON SALIU – Arena e Lajmit
Loading…
Loading…
and then