Tomori po plotësohet dita-ditës. Pas Renco Memlikës, Arbër Deliut, Frenki Lamçes, Laurent Ismailajt, Ronald Shkrelit dhe Leonit Gashit, grupit i shtohen edhe dy lojtarë të tjerë. Përforcimet këtë herë vijnë nga Mali i Zi.
Bëhet fjalë Zaid Nikoviç dhe Kujtim Dinocën, që luajnë konkretisht si mbrojtës të krahut të majtë dhe të djathtë. I pari vjen pas një përvoje te Vushtrria në Kosovë, ndërsa i dyti lojtari i linjës së djathtë është aktivizuar rishtas te Cetinje.
E megjithatë, ky është vetëm fillimi. Stafi teknik është duke intensifikuar kontaktet me të gjithë ata futbollistë të cilët kanë shfaqur dëshirën e tyre për t’u bërë pjesë e beratasve në kampionatin e ri.
Në të njëjtën kohë, tekniku Klodian Arbëri, është duke u dhënë mundësi të gjithë kandidaturave që duan një vend në ekip. Ai kërkon me këtë rast të plotësojë disa nga boshllëqet e krijuara në skuadër pas largimeve.
Për “Panorama Sport” është Polizoi Arbëri që flet për punën e këtyre tri ditëve të para. Zv.trajneri vlerëson merkaton, ndërsa thekson se janë në rrugën e duhur për të ndërtuar një ekip pretendent.
“Jemi të kënaqur si me fillimin e punës, ashtu edhe me zhvillimin e merkatos. Ne e vlerësojmë me nota pozitive, si dëshirën e grupit të futbollistëve që po stërvitim aktualisht, ashtu edhe të gjithë ata futbollistë që vijnë rishtazi te Tomori.
Ata kërkojnë që të kontribuojnë maksimalisht, por edhe të evidentojnë vlerat e tyre në skuadrën tonë. Të gjithë e dinë mjaft mirë, se të jesh pjesë e Tomorit, nuk është vetëm një nder dhe kënaqësi për ata që e veshin këtë fanellë me histori tashmë 100-vjeçare.
Janë gjithashtu të vetëdijshëm, se të gjithë ata që e kanë vlerësuar drejt dhe seriozisht kontributin e tyre për futbollin beratas, kanë përfituar jo pak prej qëndrimit në Berat.
Kjo, sepse Tomori u ka shërbyer për t’u rritur profesionalisht dhe si një trampolinë për të kaluar në skuadra të njohura të elitës. Këtë e kanë treguar me dhjetëra shembuj këto vite të fundit.
Ne na interesojnë emra të rinj dhe që kanë ambicien për t’u rritur profesionalisht”, e ka mbyllur Polizoi Arbëri.
– Arena e Lajmit
Loading…
Loading…