Regi Lushkja po shkëlqen te Sheriff Tiraspoli. Lojtari, i cili la Laçin për skuadrën moldave, në një intervistë për “Panorama Sport”, flet për kualifikimin në turin e dytë të Champions-it. Ai dha topin që më pas u kthye në gol, por më shumë se kaq, kavajasi flet për Zrinjskin, që eliminoi, por që është në turin e dytë të Konferencë Ligës kundërshtar i Tiranës. 
Lushkja paralajmëron kampionët e Shqipërisë që të kenë kujdes lojtarin kryesor të ekipit që luan në sulm. Lushkja analizon kundërshtarin e Tiranës, ndërsa thotë se ekipi boshnjak është më i fortë se Dudelanzhi. Në fund, ish-lojtari i Laçit uroi kurbinasit në veçanti, por edhe skuadrat shqiptare të kualifikohen të gjitha në turin e radhës së Europës.
Keni luajtur së fundmi me boshnjakët dhe u kualifikuat në turin tjetër të Champions-it?
Po, është e vërtetë. Kemi pasur përballë një ekip jo të lehtë. Kanë qenë dy përballje shumë të forta, ku më shumë mbizotëroi lufta. Të dyja ekipet luftuan që të kalonin me tej dhe fati në fund na buzëqeshi ne.
Si po shkon aventura e juaj te Sheriffi?
Aventura ime te Sheriffi po shkon realisht shumë mirë. Kemi bëre një fazë përgatitore shumë të mirë. Jemi përgatitur siç duhet fizikisht dhe psikologjikisht për ndeshjet e Champions-it edhe e ndjej veten në një formë shumë të mirë sidomos nga ana fizike. Jam ambientuar shumë mirë tani me ekipin dhe çdo gjë po shkon mjaft mirë. Ndihem i kënaqur.
Cili është objektivi i skuadrës suaj në Europë dhe juaji personalisht këtë sezon?
Objektivi i skuadrës sonë sigurisht është që të shkojmë sërish në grupet e Champions Ligës, siç ndodhi edhe vjet me ekipin që pati një sukses të madh, duke arritur grupet edhe duke u përballur me ekipe të mëdha si Reali apo Interi. Sigurisht, edhe synimi im parësor është që të ndihmoj ekipin dhe të bëj më të mirën, duke i shërbyer me gola dhe asiste që të arrijmë objektivat e klubit dhe t’ia shpërblejmë besimin e dhënë.
Ju sapo e keni eliminuar ekipin boshnjak Zrinjski. Çfarë skuadre është meqenëse do të luajë me Tiranën?
Të them të drejtën, siç e thashë edhe më parë, ka qenë një ndeshje mjaft e luftuar. Zrinjski është një ekip shumë i mirë fizikisht dhe ekip shumë kompakt. Pashë që ishin një grup mjaft i fortë dhe me cilësi brenda.
Cilat janë pikat më të forta dhe të dobëta të Zrinjskit?
Pikat më të forta të tyre mendoj se janë dy sulmuesit e krahut dhe sidomos pika kyçe e tyre është kapiteni, një lojtar mjaft cilësor, lider dhe golashënues i ekipit. Mendoj që Tirana duhet t’i ruhet më shume këtij lojtari, sepse shumicën e lojës ata e bazojnë te sulmuesi i tyre, që është edhe kapiteni.
Kujt duhet t’i ruhet Tirana në këtë ndeshje?
Tirana duhet të bëjë shumë kujdes kundër tyre. Të mbrohet mirë dhe të luajë më shumë me kundërsulme, sepse ata janë ekip cilësor dhe problemet më shumë i kanë në mbrojtje. Aty mendoj se duhet t’i godasë. Tirana ka lojtarë të shpejtë dhe cilësore në sulm, si Seferi e Xhixha.
Sipas jush, cili është më i fortë: Dudelanzhi apo Zrinjski?
Të them të drejtën, nuk e kam parë Dudelanzhin kundër Tiranës se si luan, por mendoj që Zrinjski mund të jetë shumë herë ekip më i fortë se ata.
Po Partizanin e Laçin i keni ndjekur në ndeshjet e Kupave të Europës?
E kam ndjekur Laçin sigurisht dhe e ndjek gjithmonë kur e kam mundësinë. Bëj edhe tifo normalisht për ata. Ndeshjen e parë që luajti në Elbasan, Laçi bëri një ndeshje të kënaqshme, por mendoj që nuk ishte në atë nivel siç jemi mësuar ta shikojmë këto vitet e fundit, sidomos në Europë.
Gjithashtu shpresoj që ndeshjen e kthimit ta fitojë dhe kam shumë besim që do të kualifikohet, ashtu si edhe Partizani, që bëri një ndeshje mjaft të mirë në transfertë dhe mendoj që do t’ia dalë me sukses edhe ndeshjen e kthimit. Thjesht duhet të futen në fushë me mentalitet fituesi dhe me besim. Pastaj çdo gjë do të shkojë siç duhet. Gjithashtu i uroj të gjithë ekipet shqiptare që luajnë në Europë suksese, dhe shpresoj të kualifikohen që të gjitha.
OLSI AVDIAJ – Arena e Lajmit
Loading…
Loading…
and then