Kushtetuesja shpalli sot vendimin lidhur me ankimin e ish-Kryeministrit Sali Berisha ndaj dy masave të sigurisë të vendosura nga SPAK dhe më pas të legjitimuara nga GJKKO, në të dy shkallët e gjykimit, ato të “detyrim paraqitje” dhe “ndalim të daljes jashtë vendit”.
Në vendimin e Kushtetueses i tërhiqet vëmendja SPAK dhe GJKKO-së që mos aplikojë dy masa sigurie njëherësh, kur e para përmbush qëllimin për të cilën kërkohet e dyta.
Kushtetuesja në vendimin e saj konsideron se masa e sigurisë “detyrim paraqitje” mund të kërkohet nga Prokuroria Speciale dhe vendoset nga GJKKO, pa pasur nevojë për një autorizim nga Kuvendi.
Në këtë mënyrë Kushtetuesja ka rrëzuar qëndrimin e mbajtur nga ish-Kryeministri Sali Berisha, i cili nisi betejën e tij ndaj SPAK dhe GJKKO-së, me argumentin se Kuvendi ishte shpërfillur dhe se Prokuroria nuk mund të aplikonte masa kufizuese ndaj një deputeti, pa marrë më parë autorizimin.
Por Kushtetuesja në vendimin e saj, lidhur me masën e dytë, atë të “ndalimit të daljes jashtë vendit” ose “bllokimit të pasaportës” duket se i tërheq vëmendjen SPAK dhe GJKKO-së, për shkak se sipas Gjykatës Kushtetuese, masa e parë, ajo e “detyrimit për tu paraqitur” përmbush edhe qëllimin e masës së dytë.
“Në lidhje me masën tjetër, Gjykata vendosi pranimin e pjesshëm të kërkesës duke shfuqizuar vendimet gjyqësore objekt të shqyrtimit kushtetues, vetëm për pjesën qe kanë caktuar masën “ndalim i daljes jashtë shtetit” ndaj kërkuesit Sali Berisha për shkak të cënimit të parimit të proporcionalitetit, në aspektin e domosdoshmërisë së kësaj mase, në kushtet kur qëllimet e saj përmbushen nga masa tjetër e dhënë ndaj kërkuesit “detyrim për t’u paraqitur në policinë gjyqësore”, thuhet në vendimin e Gjykatës Kushtetuese.
Dhe vendimi i Kushtetueses duket se është zbatuar në rastin e deputetes Monika Kryemadhi, ndaj të cilës SPAK dhe më pas GJKKO, ka lënë në fuqi masën “detyrim paraqitje”.
Nisur nga vendimi i Kushtetueses, SPAK i ccelet drita jeshile, që në rastet e masave të sigurisë “detyrim paraqitje”, të mos kërkojë autorizim nga Kuvendi, nëse subjekte të hetimeve do të jenë deputetët.
and then